• HEADING-1 GOES HERE

    DESCRIPTION GOES HERE
  • HEADING-2 GOES HERE

    DESCRIPTION GOES HERE
  • HEADING-3 GOES HERE

    DESCRIPTION GOES HERE
  • HEADING-4 GOES HERE

    DESCRIPTION GOES HERE
  • HEADING-5 GOES HERE

    DESCRIPTION GOES HERE

Martes, Setyembre 30, 2014

“Selfie” ang salita ng taon ng 2014

           
Itinanghal na salita ng taon ang “selfie” mula sa labindalawa pang kandidato sa 2014 Sawikaan: Kumperensiya sa Salita ng taon na ginanap sa UP Diliman nitong Setyembre 25-27. Pinili ng mga iskolar, guro, delegado, at estudyante ang tatlong nagwaging mga entri, kasama ang “endo” at “Filipinas.”
            Ang kilalang direktor sa pelikula at telebisyong si Jose Javier Reyes at prodyuser sa media at talent manager na si Noel Ferrer ang nagtanggol sa salitang selfie. Ang ibig sabihin nitong salita ay pagkuha ng sariling larawan gamit ang smart phone o webcam at agarang pagpapaskil sa social media. Naging labis itong popular mula pa 2012 kung kaya itinuturing ng mga sosyologo bilang sintomas ng pagkamakasarili kundi man ng lumulubhang konsumerismo ng modernong lipunan. Ginagamit ng mga kompanya ng damit at pagkain ang selfie ng mga celebrity, na rurok ng pag-iral ng selfie tulak ng modernong teknolohiya, para makapagbenta ng produkto at tumaas ang kita. Ngunit mabuti na lamang at nakatuklas ang mga Filipino upang gawing makakapuwa-tao ang selfie—sa pamamagitan ng pagse-selfie kasama ang mga kapuwa biktima ng sakuna tulad ng bagyo at pagsabog ng bulkan—upang makagawa ng akmang aksiyon ang mga nakakakita.
Ang mga sumunod na salita, ang endo at Filipinas ay kasinghalaga rin ng selfie sa buhay ng mga Filipino. Ang endo, na itinaguyod nina David Michael San Juan at John Kelvin R. Briones, ay dinaglat na “end of contract” o pagkapasó ng kontrata sa trabaho na idinisenyo upang maging kapaki-pakinabang sa mga negosyante ngunit hindi gaanong mabuti sa mga manggagawa. Naging legal itong endo sa pamamagitan ng Batas Republika Blg 6715 o ang Batas Herrera na naaprobahan noong dekada otsenta. Isinasagawa na ito mula noon ng mga mall at food chain. Hiniling ng mga tagapagtaguyod ng salita na bigyan ng wakas na ang di-mabuting patakaran sa paggawa.
Iprinesenta naman ng guro at makatang Rebecca T. Añonuevo ang magiting na pagtatanggol sa Filipinas gamit ang mga katwirang historiko at makabayan para imungkahing maging opisyal na pangalan ng bansa itong salita.
            Kasama sa mga salitang kandidato na naging palasak sa nakaraang dalawang taon ang imba, kalakal, riding in tandem, peg, hashtag, CCTV, storm surge, PDAF, bossing, at whistle blower.  
            Naging produktibo din ang mga talakayan sa kultura, wika, social media, at pagiging handa sa mga disaster. Tinalakay ng Pambansang Alagad sa Sining Virgilio S. Almario ang halaga ng edukasyong pangkultura samantalang ibinahagi ni Dr. Masanao Oue ng Osaka University kung paano nagtagumpay ang Japan sa pagbuo ng pambansang wika sa pamamagitan ng mabisang patakarang pangwika ng estado at pagpapagamit ng maiinam na textbook. Ipinaliwanag ng Chancellor ng UP Diliman na si Dr. Michael Tan ang penomenon ng social media sa paningin ng isang sosyologo, habang nagsalita naman si Dr. Mahar A. Lagmay hinggil sa pangangailangan sa pagiging handa sa kalamidad sa pamamagitan ng paggamit ng angkop na wika.
           
            Itinaguyod ang Sawikaan 2014 ng Komisyon sa Wikang Filipino (KWF); National Commission for Culture and the Arts (NCCA); Department of Education (DepEd); Commission on Higher Education (CHED); at ng UP Kolehiyo ng Arte at Literatura. Pinangunahan ng Filipinas Institute of Translation (FIT) ang Sawikaan. Bisitahin ang www.fit.org.ph para sa karagdagang impormasyon.





Walang komento:

Mag-post ng isang Komento